Dum pluraj jardekoj li estis aktiva en la esperantista movado de la iama Jugoslavio, same kiel en Serbio, la regiono kaj internacie – aparte en la Internacia Ligo de Esperantistaj Instruistoj (ILEI), kies prezidanto li estis dum du mandatperiodoj, kaj dum longa tempo ankaŭ membro de ĝia estraro.

En Serbia Esperanto-Ligo li engaĝiĝis en pluraj sekcioj kaj teamoj, antaŭ ĉio en la Instruista sekcio, ĉiam preta kontribui al la komunumo kaj helpi.

Ni memoros lin pro lia sindediĉo, kunlaboremo kaj amikeco.
Ni esprimas sinceran kondolencon al lia familio, amikoj kaj al ĉiuj, kiuj lin konis.

Serbia Esperanto-Ligo

The post In memoriam Radojica Petrović (1949–2026) appeared first on Serbia Esperanto-Ligo.

En kunlaboro inter la Mezlernejo pri kemio kaj medicino en Vršac kaj la Asocio de Blinduloj kaj Malfortevidantoj de Suda Banato, la 30-an de januaro en la lerneja klubejo okazis nova prezento de la projekto „Multmedia kolekto de literaturaj verkoj de blindaj kaj malfortevidantaj aŭtoroj“, kiun la asocio realigis dum la pasinta jaro.

Aparta parto de la programo estis dediĉita al la prezento de la internacia lingvo Esperanto. Pri ĝia estiĝo, signifo kaj bazaj trajtoj parolis Lorijan POPI, prezidanto de la Asocio de Blinduloj kaj Malfortevidantoj de Suda Banato kaj prezidanto de la Sekcio pri informado de Serbia Esperanto-Ligo.

Tiuokaze, al la ĉeestantoj estis disdonita ankaŭ flugfolio preparita de la Serbia Esperanto-Ligo, per kio ĉi tiu lingvo, kiu kunligas homojn el diversaj kulturoj, estis plue proksimigita al la publiko.

Tiu ĉi agado denove montras la gravecon de kunlaboro inter organizoj en la antaŭenigo de inkludo, kulturo kaj reciproka kompreno, same kiel en la disvastigo de la ideo de Esperanto kiel ilo de internacia komunikado.

Lorijan POPI

The post Promocio de verkoj de blindaj kaj malfortevidantaj aŭtoroj kun prezento de Esperanto appeared first on Serbia Esperanto-Ligo.

Malfermiĝis la aliĝoj por la 77-a Kongreso de IFEF (Internacia Fervojista Esperanto-Federacio), kiu okazos en Serbio de la 23-a ĝis la 30-a de majo 2026. La partoprenantoj renkontiĝos en Beogrado kaj Mokra Gora, du lokoj kiuj ofertos riĉan programon, belajn pejzaĝojn kaj varman gastamon.

La Kongreson organizas IFEF kunlabore kun Serbia Esperanto-Ligo (SEL). La aranĝo kunigos esperantistajn fervojistojn el diversaj landoj por kunesti, diskuti, konatiĝi kun lokaj vidindaĵoj kaj ĝui la unikan etoson de internacia kongreso en Balkanio.

Ni ĝojas inviti vin aliĝi kaj partopreni la eventon!

Pliaj informoj:
http://ifef.free.fr/IFEF2026

Aliĝilo:
https://forms.gle/CYyetgbs8eoCZ53SA

Programo de la ekskursoj:
https://esperanto.org.rs/wp-content/uploads/2026/03/Programo_ekskursoj_IFEF-kongreso.pdf

Kiel alveni al Hotelo “Palas”

The post Aliĝu al la 77-a Kongreso de IFEF en Serbio! appeared first on Serbia Esperanto-Ligo.

Vendrede, la 24-an de oktobro 2025, en la malgranda amfiteatro de la Instruista Fakultato en Vršac, okazis interesa kaj inspira prelego pri planlingvoj, kun speciala atento al Esperanto – la plej konata internacia planlingvo.

La prelego kunigis plenan amfiteatron da studentoj kaj gimnazianoj, kiuj, akompanataj de siaj instruistoj, atente aŭskultis pri la kreo, la ideo kaj la nuntempa uzo de ĉi tiu lingvo, kiu apartenas al neniu, sed samtempe al ĉiuj.

La prelegintoj estis Jovan Zarković, samtempa tradukisto kaj profesoro pri la rusa lingvo, estrarano de Serbia Esperanto-Ligo kaj prezidanto de la Asocio de Sciencaj kaj Fakaj Tradukistoj de Serbio, kaj Nedeljka Ložajić, magistra psikologo kaj estraranino de Serbia Esperanto-Ligo.

La aranĝon organizis la Asocio de Blinduloj kaj Malfortevidantoj de Suda Banato kaj la Civitana Asocio Vita Optima, kun subteno de la Serbia Esperanto-Ligo kaj la Asocio de Sciencaj kaj Fakaj Tradukistoj de Serbio.

Esperanto – la lingvo, kiu kunligas homojn!

The post Kial indas lerni Esperanton? – prelego ĉe la Instruista Fakultato en Vršac appeared first on Serbia Esperanto-Ligo.

En la aranĝo de la Sekcio pri Socia Vivo de la Asocio de Esperantistoj de Serbujo, kiun gvidas Bojan Veliĉkoviĉ (Бојан Величковић), kaj de la Asocio de Admirantoj de la Verkaro de Danko Popoviĉ (Данко Поповић), en la Fondaĵo / Legato de Danko Popoviĉo en Aranĝelovaco, okazis prezento de la esperantlingva traduko de la kontraŭmilita majstroverko “Libro pri Miluteno / Књига о Милутину”.

La temo de la prezento estis „Avantaĝoj kaj defioj ĉe la tradukado de nacia literaturo en Esperanton“. Prelegis Zlatoje Martinov kaj Jovan Zarkoviĉ, kaj kontribuis ankaŭ Saŝa Pilipoviĉ.
La partoprenantojn salutis Vladan Glišić, prezidanto de la Asocio de Admirantoj de la Verkaro de Danko Popoviĉ.

La aranĝo okazis la 11-an de oktobro 2025, kun 20 partoprenantoj, kaj ĝi estis kompletigita per komuna vizito al la Popola Muzeo.

Ĉar Esperanto fariĝis la naŭa lingvo, en kiu ĉi tiu verko aperis, la Asocio de Admirantoj de la Verkaro de Danko Popoviĉ planas organizi apartan renkontiĝon, dum kiu tradukintoj al diversaj lingvoj prezentos la defiojn, kiujn ili renkontis dum la tradukado, kaj komparos la solvojn, kiujn ili aplikis.

The post Pri la esperantlingva traduko de “Libro pri Miluteno” en Aranĝelovaco appeared first on Serbia Esperanto-Ligo.

en lia FONDAĴO en la urbo Aranĝelovaco, sabaton, la 11-an de  2025, je la 14-a horo, organize de Asocio de tradukistoj de scienca kaj faka literaturoj de Serbio, kaj Sekcio pri socia vivo de Serbia Esperanto-Ligo, okazos prelego kaj disputo pri la temo:

„AVANTAĜOJ KAJ MALFACILAĴOJ DUM TRADUKADO DE NACIA LITERATURO AL ESPERANTO”

Prelegontoj: Zlatojo Martinovo (Златоје Мартинов) kaj Jovano Zarkoviĉo (Јован Зарковић)

Ni invitas amaskomunikilojn kaj ĉiujn interesiĝantojn ĉeesti kaj partopreni la diskuton pri la graveco kaj defioj de tradukado de naciaj beletraĵoj al la internacia lingvo Esperanto.

Kiamo kaj kieo:
La 11-a de oktobro 2025, La fondaĵo de Danko Popoviĉo, Strato “Miŝarska” 27, urbo Aranĝelovaco

La eniro estas libera.

The post Invito – “Libro pri Miluteno” appeared first on Serbia Esperanto-Ligo.

Jovan ZARKOVIĆ (Beogrado):

Ĉi-jare la kongreso de ILEI estis en Beogrado (Serbujo). Ĝia ĉeftemo estis apliko de artefarita inteligento en la instruado de Esperanto.

La hotelo “Palaso”, laŭ mia sperto, estis ideala elekto – urbocentro kun prezoj nealtaj kompare kun ĉiuj aliaj similaj hoteloj en Beogrado. Afabla hotelistaro kaj helpo en organizado de ĉiuj programeroj ebligis sukcesan daŭron de la kongreso. Ĝia loko en la centra centro de la urbo ebligis al la kongresanoj promeni kaj vidi multajn vidindaĵojn en libera tempo.

Ĉar la kongreson partoprenis kelkaj junaj volontuloj, kiuj lernis Esperanton malpli ol unu jaron, ilia entuziasmiĝo kaj vortigita deziro daŭrigi sian esperantumadon estas la plej bona pruvo pri la bona etoso dum la kongreso.Personoj, kiuj per sia sindona kaj senlaca laboro ebligis sukceson de la kongreso estia Aranka László kaj Laura Brazzabeni, al kiuj ni ĉiuj ŝuldas grandan dankemon.

Nedeljka LOŽAJIĆ (Beogrado):

Ĉi-jare mi la unuan fojon partoprenis ILEI-Kongreson kaj mi eĉ estis membro de la LKK. Tio estis por mi grava sperto.

Mi multon lernis kaj la etoso estis agrabla. Mi, kiel membro de LKK, scias ke ne ĉio iris glate, sed ni klopodis tuj reagi kaj solvi aperintajn problemojn. La programo estis abunda kaj mi kredas, ke ĉiu partopreninto povis trovi por si interesan kaj utilan programeron.

Mi precipe ĝojas, ke en la Kongreso partoprenis novaj, junaj esperantistoj. Mi tre bedaŭras, ke pluraj aliĝintoj el Afriko ne sukcesis ricevi vizon por ĝui la eventon. Kongresoj de ILEI certe povas kontribui al progreso de nia Movado kaj ni klopodu aktive partopreni en ilia organizado.

Kristina ILIĆ (Beogrado):

Ridetoj. Scivolemo. Mondo. Per tiuj tri vortoj mi povus priskribi la Kongreson de esperantistaj instruistoj, dum kiu mi havis la ŝancon esti ne nur partoprenantino, sed ankaŭ volontulino kaj tiel kontribui al ĝia organizado. Kvankam mi estas komencantino en la lernado de Esperanto, kuraĝigaj rigardoj kaj koraj ridetoj helpis al mi senprobleme kaj kun ĝojo plenumi la registradon de la partoprenantoj ĉe la Akceptejo, paroli kun ili kaj helpi ilin dum mia partopreno de la kongreso.

Precipe restis en mia memoro la promenekskursoj al Kalemegdano kaj al la Etnografia muzeo, ĉar tion mi ĝojas fari ankaŭ en mia libera tempo, kaj nun mi povis dividi tiun aktivecon kun novaj konatoj kaj amikoj. Ni ĉiuj estis scivolemaj aŭdi ion novan – kaj ĉi-foje en Esperanto! Mi komprenis multe pli ol mi atendis.

Mi ĝuis, ke la partoprenantoj venis el diversaj landoj, kaj tamen ni facile interkompreniĝis danke al Esperanto. Tiun semajnon la tuta mondo estis en Beogrado, kaj la tuta mondo parolis unu lingvon: Esperanton.

Danijela PETROVIĆ (Beogrado):

Mi feliĉas, ĉar ĉi-jare ILEI kongreso okazis en mia lando. ĉi tio estis mia dua ĉeesta la kongreso ILEI. Ĝi sukcese pasis.

Mi kontentas ke mi renkontis malnovajn geamikojn, kaj ekkonis novajn. Dum la kongreso mi ĉeestis la paroligan kurson, kiun gvidis Roberto Tresoldi el Italio. Etoso estis bonega kaj ni havis kvintagan kurson pri diversaj temoj. Interkona vespero, lingva festivalo, ekskursoj kaj aliaj prelegoj kiujn mi ĉeestis, lasis tre belajn spertoj kaj memoraĵojn. Artvesperoj estis tre abundaj.

Amikumado estis la plej grava, kaj volontuloj kiuj helpis, havis gravan rolon. Danke al nia Lakk teamo, la kongreso estis bonege organizita.

Dragana DUČIĆ (Užice):

En nia vejnaro Esperanto fluas –  
dum tuta tag’ lernas ni kun diligento,
vespere distriĝas ni kun ĝoja sento
en bona etoso dum muziko bruas.

ILEI-Kongreso el la tuta Mondo
jen esperantistojn arigis ag-cele;
Kresku, disvastiĝu Esperanto-ondo,
ni ĝin sekvos longe, fervore, fidele!

(tradukis: Ž. N.)

The post Niaj impresoj pri la Kongreso de esperantistaj instruistoj appeared first on Serbia Esperanto-Ligo.

Se vi ankoraŭ ne aliĝis, Serbia Esperanto-Ligo (SEL) kore invitas vin al la 58-a kongreso de ILEI (Internacia Ligo de Esperantistaj Instruistoj), kiu okazos unuafoje en Beogrado, de la 19-a ĝis la 26-a de julio 2025!

La kongreso okazos en la Hotelo “Palace” en la urbocentro. La kongresaj ekskursoj gvidos al Fruŝka Gora kaj Novi Sad, ĝis Topola kaj Kragujevac, apud Danubo ĝis Viminacium, kaj al la regiono de Resava. La restoracio “Tri Ĉapeloj” en Skadarlija estas rezervita por la kongresa bankedo.

La ĉefa temo de la kongreso estas: Artefarita intelekto kaj lingvolernado, kaj la temo de la enkadra simpozio: Artefarita intelekto kaj kulturo.

Jen la labora, kleriga kaj kultur-arta PROGRAMO de la evento kaj alloga TURISMA programo.

Kial indas partopreni?

Ĉiu partoprenanto trovos ion por si. Vi renkontos malnovajn kaj novajn amikojn, lernos ion novan kaj lernigos al la aliaj ion el viaj spertoj.

Ĉu vi estas ILEI-membro aŭ ne, ĉiuj estas bonvenaj! Ni bonvenigas ankaŭ lernantojn, homojn, kiuj interesiĝas pri instruado, kaj ĝenerale ĉiujn esperantistojn de kiu ajn lingvo-nivelo.

Rabatoj por aliĝintoj el Serbio: ĝis la fino de junio la kongresa kotizo por serbiaj membroj de ILEI estas nur 23 eŭroj kaj por ne-membroj 28 eŭroj. La kotizo por la partatempa partopreno (1-2 tagoj) estas 12 eŭroj. En julio la kotizoj plialtiĝas.
La aliĝintoj el aliaj landoj trovos la kotiztabelon en la aliĝilo (vidu la ligilon sube).

Ĉu vi ŝatus helpi?

Se vi povas kontribui al la organizado, eĉ per malgrandaj taskoj, via helpo estos tre bonvena: ekzemple, helpi en teknikaj taskoj, prezenti la serban (aŭ alian) lingvon dum la lingva festivalo, traduki el la serba al Esperanto – laŭbezone, aŭ simple partopreni la kongresejajn programerojn kaj/aŭ la ekskursojn kaj amikumi kun la eksterlandaj gastoj.

Kie vi trovos pliajn informojn?

• Retejo de ILEI: ilei.info
• Aliĝilo: https://forms.gle/3tnbLzm6AZrc2UYa8
• Loĝmendilo: https://forms.gle/dfr7eidzxjZkm9Rh9
• Turisma mendilo: https://forms.gle/Udwbkd4jUYXQMdwWA
• Eventaservo: eventaservo.org/e/ILEI-58
• Telegram-grupo: t.me/Beogrado2025
• Retadresoj por kontakti nin: laslo.az@gmail.com. ilei.kongresoj@gmail.com

Pri la kongresa emblemo

La emblemon de la kongreso dezajnis Emese Kovács Pécskai (Emeŝe Kovaĉ Peĉkai), juna pentrartistino, instruistino pri pentroarto el Čantavir. Ŝi estis ano de la Esperanto-fakrondo en Politeknika Lernejo en Subotica, kaj plurfoje partoprenis Esperanto-konkursojn. Per tiu ĉi emblemo ŝi denove subtenas nian movadon.

Ni antaŭĝojas vian partoprenon kaj kunlaboron por fari ĉi tiun kongreson memorinda, samkiel la antaŭe organizita ILEI-kongreso en Čačak, antaŭ 6 jaroj, kaj la kombinita evento “Interkulture kaj inkluzive” en Zemuno, aŭguste 2024!

Kore,
nome de LKK,
Aranka Laslo

The post Refoja INVITO al la ILEI-kongreso 2025 appeared first on Serbia Esperanto-Ligo.

Mi jam de longe aŭdis la frazon: kiam oni lernas novan lingvon, oni vidas la mondon tra nova fenestro. Mi sentis tion mem, kiam mi lernis la anglan. Sed mi ne pensis, ke tiel rapide post la komenco de mia lernado de Esperanto mi renkontos esperantistojn – junajn esperantistojn el diversaj landoj.

Tio okazis dum studsesio en Budapeŝto, de la 3-a ĝis la 7-a de februaro 2025. La sesion organizis TEJO (Tutmonda Esperantista Junulara Organizo), kun subteno de la Konsilio de Eŭropo. La temo estis: „Kunaj por aktiva junulara partopreno: Forigante barojn por inkluziveco kaj kontraŭbatalo de diskriminacio en Eŭropo“. La laborlingvoj estis Esperanto kaj la angla. Ĉiuj partoprenantoj ricevis aŭskultilojn, kaj povis elekti lingvon.

Mi estas blindulo, kaj tio estis mia unua vojaĝo sen akompano. Ĉe ĉiuj flughavenoj – en Podgorico, Beogrado kaj Budapeŝto – la helpo estis tre bona. Pro malfruo, mi alvenis en Budapeŝton la 3-an de februaro matene, dum la unua sesio. Sed tio ne estis problemo, ĉar la laboro estis grupbaza kaj neformala, tiel ke ĉiuj povis facile kunlabori.

La 3-an vespere estis internacia vespero. Ĉiu partoprenanto kunportis ion de sia lando. Mi alportis vinon kaj ŝinkon el Montenegro. La etoso estis amika, kaj la junuloj babilegis inter si. Estis homoj el multaj landoj: ekzemple du knabinoj el Serbio, unu albano, unu polino, unu kartvelo, unu hispanino, unu portugalo, unu rus-tataro (kiu loĝas en Serbio), unu francino, unu armeno… Sed plej interesaj por mi estis du belgoj. Ili estas denaskuloj, ili parolas Esperanton denaske, ĉar iliaj gepatroj uzas ĝin. Ili ankaŭ bone parolas la anglan. Ni ludis ludon: ili parolis Esperante, mi respondis angle, kaj uzis tiom da Esperanto kiom mi povis. Se mi ne komprenis iun vorton, ili tiam klarigis en la angla.

Tiam mi komencis kompreni: la Esperanto-movado estas viva, juna, kaj havas bonan estontecon – se ni ĉiuj kunlaboras. Tio estis ankaŭ la ideo de la tuta seminario.

Mi povus rakonti pli pri ĉiu tago, sed mi ne volas tro longe verki. Mi nur diros, ke la programo estis vigla kaj riĉa je aktivaĵoj. Estis grupaj diskutoj pri temoj kiel tutmondiĝo, migrado, homaj rajtoj, inkluziva socio, junularaj politikoj, ktp. Krom tio, ni faris teamajn ludojn kaj rolojn – tiel ke ĉiuj povis partopreni.

Jam pasis pli ol du monatoj, sed la memoroj restas freŝaj. Mi ne scias, kiajn rezultojn havos la seminario por TEJO aŭ la Konsilio de Eŭropo. Sed por mi persone, tio estis granda paŝo antaŭen. Mi esperas, ke mi akiris novajn amikojn por la estonteco.

Nikola ZEKIĆ

Nikola estas junulo el Montenegro, magistro de etnomuzikologio, studinta en Beogrado (Serbio). Li en aprilo 2025 finis la retan kurson de Esperanto por komencantoj nevidantoj, organizatan de Serbia E-Ligo, sub la gvido de Nedeljka LOŽAJIĆ kaj Živanko NOVAKOV. Meze de la kurso li havis okazon partopreni dulingvan seminarion kiel stipendiato de TEJO.

(La teksto aperis kiel artikolo en la Juna Amiko 2/2025, p. 14-15)

The post Studsesio en Budapeŝto appeared first on Serbia Esperanto-Ligo.

La 76-a Internacia Fervojista Esperanto-Kongreso okazis de la 30-a de aprilo ĝis 4-a de majo 2025 en Žilina (Slovakio), urbo kiu havas longjaran fervojistan E-movadon. La Kongreson organizis SAFE (Slovaka Asocio de Fervojistoj-Esperantistoj) kunlabore kun E@I (ankaŭ konata kiel „Edukado@Interreto”). Aŭspicianto de la Kongreso estis Ministerio pri transporto de Respubliko Slovakio.

Jam antaŭe estis decidite, ke organizanto de sekvantjara, la 77-a IFK estu Serbia E-Ligo. Nome de SEL, Nedeljka LOŽAJIĆ kaj Bojan VELIČKOVIĆ (membroj de la LKK) prezentis la Kongreson al la ĉeestantoj kaj invitis ilin veni al Beogrado kaj Mokra Gora, kie okazos la Kongreso de la 23-a 30-a de Majo 2026.

En ĉi-jara Kongreso partoprenis pli ol 80 esperantistoj, kiuj dum la tagoj havis eblecon aŭskulti interesajn prelegojn, ekkoni vidindaĵojn de urbo Ĵilina kaj ĝia ĉirkaŭaĵo, senti gastamon de la gastiganta lando kaj pasigi agrablajn momentojn en esperantista rondo.

Nedeljka Ložajić

The post La 76-a IFK appeared first on Serbia Esperanto-Ligo.