En februaro 2023 Serbia Esperanto-Ligo (SEL) kandidatiĝis por subvencio de Erasmus+ per sia unua projekto proponita al tiu programo. Ĝi estis iniciatita de la Balkan-Danublanda laborgrupo (formita en januaro 2023) kaj pretigita en kunlaboro de Radojica PETROVIĈ kun Sara Spano el Kosmo Strategio.
La projekto apartenas al la kategorio KA1 (moviĝprojektoj), en la branĉo de pluedukiĝo de plenkreskuloj, kio perfekte kongruas kun la aktivadoj kaj celoj de SEL. Ĝi estis aprobita kaj registrita sub la numero 2023-1-RS01-KA122-ADU-000141195, kun la titolo: Trejnado kaj Moviĝo de Volontulaj Instruistoj kaj Trejnistoj (Training and Mobility for Voluntary Teachers and Trainers), kun tempodaŭro de 18 monatoj (inter la 1-a de julio 2023 kaj la 31-a de decembro 2024).
Ĝi konsistas el tri moviĝplanoj por entute kvin membroj de SEL:
- 2 instruistinoj al la ILEI-kongreso en Lignano Sabbiadoro (Italio) kaj la seminario pri Interkultura Kompetento – en aŭgusto 2023;
- 2 instruistinoj al la unujara Instruista Trejnado en Poznano (Pollando) – fakte, al la unua intensa semajno de la kurso – en septembro 2023;
- 1 instruisto al la Hispana Kongreso de Esperanto kaj antaŭkongrese al la Internacia Seminario pri Sociaj Retoj kaj Homa Konduto, en Sevilo (Hispanio) – en oktobro 2023.
Krome, en Serbio estos organizita seminario kun invito de eksterlandaj prelegantoj, Sara Spano kaj Francesco Maurelli (ambaŭ el Italio), en aŭgusto 2024.
